Baýramsoltanyň doglan gününe bagyşlanan goşgy

Ýör, gideli, Baýram hanym, Watana,
Bizi indi KNB tutjak bolmaýar;
Olar indi akyllandy azajyk,
Olar indi, meger, bizi goldaýar.

Dogry, käbirleri diýýär: “Garaşyň,
Gelmäň entek, sowulanok hatarlar!”
Daşarda birisi ýalbarýar: “Gitme,
Baran günüň mergen tutup atarlar!”

Walla, oka pul berenňe degjekmi,
Kime gerek biziň gara başymyz?
Ýene bir zat, aýan ahyry Alla,
Biz diňe halallap iýdik aşymyz!

Eger-de ýetimiň, naçaryň hakyn,
Ejiziň rysgalyn ogurlan, alan
Soňsuz döwran sürüp geçmeli bolsa,
Hak, hakykat diýmek owadan ýalan!

Elbetde, biz ol ýalana aldanan
Iň ilkinji, ýa-da soňky jübüt däl,
Baýram hanym, ýör gideli, Watana,
Biziň ýoldaşymyz boldy, bolar päl!