Nirelerde, kimler bilen at salyp,
ýa pyýada, garym gazyp, atyşyp,
tanamadyk, bilmedigin öldürip,
duşman diýip, özi ýaly adama,
diňe ýesir, diňe tarapy başga,
maýyp bolup, el-aýagyn aldyryp...

Görünmeýän agyryňy,
içde ýatan derdiň, gaýgyň,
ýaralaryň agzap ýörme,
gül, gürrüň et, zeýränýäni
gowy görmez dünýe, pany,
öwren bile ýaşamagy...

Şu bolşuňy sakla gorap,
berme kimsä, olar gowy
görýär seniň erjelligiň,
tutanýerli, höçjet, belki,
hem çydamly, hem sabyrly,
kanagatly, sylaýarsyň

Olar bilýär adamlar
geplemese gep bolmaz,
dymsa, näçe garaşsa,
köpüň derdi dep bolmaz,
şonuň üçin gorkuzyp,
susdurmaly milleti...

Bu adamlar ýanyňda ýok,
bile çilim çekişmeseň,
nas atmasaň bile, içip,
goşulmasaň gep-gybata,
hehe-hehe, gülüp, göçüp,
ýoldaş bolup gidişmeseň

Adam diýdi arkamda
duranyňy dag ýaly
bilýändirin, minnetdar,
wah, diýmese boljakdy,
aýdypdym öň gelýänin
ähli edýän gepiniň...

Mesele seň gepläniňde,
dymanyňda däl kämähal,
belki-de ýok biljek muny,
ýa diňlejek, ýa düşünjek
aýdan, aýtjak sözleriňe,
dile gelen ýa gelmedik,

Millet gutaranda ilki şahyry,
ýazyjysy ölýän eken dirikä,
ölenini bilmän, kast edip günde,
öz-özüne el galdyryp, arkadan,
ýa öňünden gelip, elin daňsalar,
dili bilen alýan eken aryny...

Ýüzüň iki bolsa erbet,
bir ýüzüňi gizläp mydam,
beýlekisin görkezmeli,
sözüň iki bolsa erbet,
bu birini saklap mydam,
beýlekisin görkezmeli...

Seniň eneň, ataň bardyr obada,
gaýgy edýän şäherdäki ogluny,
çagalaryň bardyr garaşýan günde,
ýanýoldaşyň, gözün dikýän ýoluňa,
ýöne ýolda adam bolsa ýalan bar,
talaň galmaz, galmaz uruş, gykylyk...