Jogapsyz sorag

“Aýazhan, sen çarygyňa bakarak!” –
Diýip gadymlarda bir han özüni,
Gözi ýer görmejek hala ýetende,
Ýa-da aýagyny üzende ýerden,
“Sen hudaý!” diýene diýip: “Men bende”,
Adyn asyrlara ýazyp gidipdir,
Şeýdip azmazlygy wesýet edipdir.

Adam bolup galjak bolsaň eger-de,
Hatda azdyrlaňda azmajak bolsaň,
Müň dollarlyk köwüş berseler peşgeş,
Penjek, balak, galstugyň, köýnegiň,
Türsük-maýkaňa çen ýüpekden bolsa,
Nepisinden nepis edip tikilen,
Müň däl, on müň dollar, ýüz müň bolsa ýa,
Millionlap dollara durýan maşyny,
Gämini, uçary berseler sowgat,
Ata-babaň çarygyny, çokaýýyn,
Ýa-da ýyrtylýança garalap geýen,
Aşagyn çüýleden sowet köwşüňi
Ýatylýan otagda assaň diwardan,
Toba etdirermi, düşirmi aşak,
Bu soraga jogap tapamok, walla,
Näçe oýlansam-da ýeňsämi gaşap...