Rumy bilen söhbet

Arada Rumy bilen gürleşdim,
säher çagy, ýarym oýa, ukuda,
ol başyňdan bela inse, ýaradan,
diýme diýdi uly bela uçradym,
oňa derek bela ýüzlen, diý diýdi:
gorar meni beýik biribar, hudaý!

Soň diýdi ol ýalňyzlygyň ýamany
galmak bolar saňa, seniň sözüňe,
niýetiňe düşünmezler içinde,
hem diýdi ümsümlik taňrynyň dili,
a galany terjimedir bolgusyz,
gerekmejek hiç geçegçiň göçünde.

Diýdi munda sen nämäni gözleseň,
olam seni gözleýändir ýaltanman,
hemem diliň dişlemezden öňürti,
ýüregiňi dişle, niýetiň düzet,
sebäbi söz gaýdýar ýürekden başda,
a soň dilden sypyp, öwrülýär palta.