Hekaýanyň hekaýasy

***
Olar örän akylly. Akyl berene sögýärler.

***
Aýtdym, aýtdym, düşünmedi. Özüm samsyk boldum.

***
Umumy dälilige dahylsyzy "däliniň dälisi" atlandyrdylar.

***
Bileje türme gurdular. Agzybirje girip-çykýarlar.

***
Hemmesi akylly dymýar. Çydaman geplän samsyk.

***
Edaradaky halyny ogurlansoň, öýüne adam çagyrmaýar.

***
Bende. Söýenine ýetip bilmedi, bahyllyga öýlendi.

***
Gapyrjaga sygmady. "Jenaýatçy" diýip, türmä saldylar.

***
Dogan-garyndaşdan aýryldym. Arada döwlet dur.

***
Hekaýanyň hekaýasy özüň bolmak, başga däl.

***
Ýol tapman, üstümden geçirdim. Ýodadyr öýtdüler.

***
Bogulsa-da çydaýar, çünki ýene bir gelmekçi.

***
Ony egindeşleri öldürdi. Göni däl, gytaklaýyn.

***
Dereje. Ýüzüňe: "He-he..." Ýeňsäňden: "Haýyn, haýyn!"

***
Wezipe: Hapa ýalap, "süýji" diýip gygyrmaly.

***
Adalatyň adyndan daňylgy hakykaty üýşüp zorladylar.

***
Talaňçylar bir-biregi goldady, talanýanlar goldamady.

***
Ozalky resminiň aýallary: Öň biz tussagdyk...

***
Eklenç üçin gara işläp, sypynanda ýazýar.

***
Türmä ilki dogrulary, soňundan ogrulary saldylar.

***
Aristokrat. Soňky ýumşuny etmedim, jaňyny kesdi.

***
Distansiýa hakykatdanam beýik, ýakyndan görmedigiňi tanaňok.

***
Oligarhlaryň çagasy Pöwrizede, meniňki sürgünde ulaldy.

***
Ýaşajaga ýalan sözlerden başga işem gerek.

***
Hökümetiň sesi gataldygyça dükanlar boşamak bilen.

***
Garaşsyzlyk baýramy. 25-den 19-sy bosgunlykda bellendi.

***
Eşek ogurlady. Yzyna ogurlatdy. Ogrudan öýkeledi.

***
Göreşe çykarsyň. Ýaralanarsyň. Söweşsiz ölenler güler.

***
Gözlenýän zat bir bolsa, duşmanlaram ylalaşar.

***
Halky ýuwaşatmak üçin žurnalisti töhmetde aýyplarlar.

***
Ejeňi, kakaňy öldüren bidöwlet ’sagbola’ garaşar.

***
Iş etjege güýç, busjaga ketek berler.

***
Ýykjaga-da, gurjaga-da baş aýlaýan ýalan gerek.

***
Garyplaryň puluna baýlara köşki-eýwan gurdular.

***
Aktual interwiýu. Ylalaşylan soraglar. Boş jogaplar.

***
Maňa sögülende iki, ezijide - ýarym paý.

***
It uruşdyrmagy bilmezdi. Adam uruşdyrmaga ussatdy.

***
Okan namazy ürküzen gurbagasyna degdi, aldatdy.

***
Beýik hukuk goraýjy. Aýalynyň ýaşmagyny açdyrmady.

***
Ýigrendigi dissident. Dissident "gorap", çörek iýýär.

***
Özüni aşak basyp, işini basgançak edindiler.

***
Iki aganyň hyzmatkäri: hakykatyň hem ýarymçyklygyň.

***
Üstüme gelmedi. Düşümejege baryp, ýüregimi agyrtdym.