Bolşewik mekdebi

Başlaryny çekip Lenin, Stalin,
bolşewikler bize öwredip gitdi
adamlary öldürmegi kast edip,
ýok etmegi ynsan bolsa özünde,
ynanm, umyt nury bolsa gözünde,
öz-özlerin bilip, sylamaz ýaly,
hormatlamaz ýaly adamyň işin,
yhlasyny, höweslerin owadan,
başgalaryň ornun alyp, gysmaýan,
talamaýan, depesinden basmaýan,
iň ozaly pikirinde, niýetde
gowy, tämiz adamlary agtaryp,
ýeke-ýeke, toplap ýok etdi olar,
döretdiler ýalançylyk mekdebin,
ýetişdirýän bimessebi, kezzaby,
ýüreksiz, beýnisiz, gepe düşmeýän,
üstesine gezek bermän gepleýän,
akly ýetýän bu dünýä däl, o dünýä,
indi bary, bolan işler, bolmadyk,
siňe baksaň, surat ýaly görünýär.

Alym bolsun, bolsun ýazyjy, şahyr,
başlyk bolsun, bolsun çişlik bişirýän,
bolmaz ýaly ýüzi-gözi, ýeňsesi,
tanap bolýan edebinden, aslyndan,
bolar ýaly gepi, sözi süwümsiz,
biri-birin aldamak däl, gülmek däl,
ýalan-ýaşryk gürrüňlere guwanyp,
öz-özlerin aldar ýaly etdiler,
sorag beren dönük boldy, diýdiler:
arabadan aýak sallap gitdiler,
heläk etdi heläklerden düzülen,
garny doýsa, gözi doýmaz partiýa,
aýydry ol adamlary özünden,
daşlaşdyrdy taryhyndan, sözünden,
ogullaryn, gyzyn elinden aldy,
diňe ölüp gutulanlar diýdiler:
çyda, kän däl, ýene azajyk galdy.