Koloniýa mirasy

Basyp alan açgözleriň,
gyryp erkek göbekliňi,
diňe toprak guçup doýjak,
saňa diýen nadan, çöken,
gowy sözi bolsa ejeň...
seniňki-de başga söz däl,
hut şo sözler boljak eken.

Basyp alan güýç-güýç ýeten,
urmak, çapmak baş hünäri,
aglak ili ezse diňe,
ýere düşmän, dik depäňde
aýakgaply gezse diňe,
seniňki-de erteki gün
şeýle hünär boljak eken,
garny doýan ajy aldap,
ýorganyna saljak eken,
ýetim çagaň haky halal,
alanyňky boljak eken,
il pyýada, çörek atly,
emel ýeten, nirde bolsa,
il yrsgalyn aljak eken...

Basyp alan iki ýüzli,
iki sözli bolsa mydam,
okasa-da her mekdepde,
basylanam iki ýüzli,
iki sözli boljak eken,
öň pylandym, öwünse-de,
bolsa-da kän gyzyl ýüzli,
Garagumdan kanal çekip,
pagta ýygyp, soljak eken,
galjak eken gara günde,
basyp alan, içde galsa,
boljak eken agyr künde...