Çukur maslahaty

Okaman çykmarsyň çukurdan, dogan,
bir-biregiň aýagyndan aslyşyp,
ejesine sögüp birek-biregiň,
bajysyna sögüp birek-biregiň,
okamaly zady eşitmän, bilmän,
diňlemeli zady bellige alman,
wagtyň, ömrüň ogurlaýan kelpeňe,
gözel günüň peşgeş berip, etme kül,
tirkeşemeli adamlary ýa-da däl,
gürleşmeli adamlary ýa-da däl,
bilmän seniň barjak ýeriň köne käl,
içi daşdan doly, sil bilen gelen,
otur aşak, gykylygyň bas ilki,
gulagyň eşitsin diýýän zadyňy,
özüň urup, öz-özüňi güň etme,
haýpyň gelsin iň bolmanda özüňe,
başgalara şepagatyň, sylagyň,
ýa hudaýdan asla gorkyň bolmasa,
rehim et seni dünýä getiren
ene-ata, dogan-gardaş, dost-ýara,
çagalara, yzdan gelýän, özüňki,
başganyňky, haýpyň gelsin azajyk,
seniň bilen ölmeli däl iliň-de,
azaşdyrma bütin ömrüň azaşyp.