Garaşsalar

Eger yzda garaşsalar,
eglendi-le diýip, garap
ýollaryňa gije-gündiz,
on ýyl soňam ýatlap gowy
işleriňi, günäňi däl,
gelip bolar o dünýeden,
geýip täze aýakgabyň,
ýüpek şalyň boýna sarap,
diýipdir bir şahyr joşup,
oba näme alysdaky,
şäher näme ol yklymda,
başa pena bolan, duzun,
çöregini gysganmadyk,
ýa ýat iller, ýat diýmedik,
ülke näme dagdan, düzden,
deňizlerden aňyrdaky,
gelip bolar diýipdir ol,
ýa edipdir arzuw gaty,
garaşyň siz gidenlere,
ýykjak bolman töhmet atyp.