Sen yzyňa ahmyr bilen seretme

Sen yzyňa ahmyr bilen seretme,
bolan işe peýdasy ýok ahmyryň.
Sen yzyňa gahar bilen seretme,
bolan işe peýdasy ýok gaharyň.

Sen yzyňa bakyp, gyýylma hergiz
görüp bilmäniňe aly, hiläni.
Sen yzyňa bakyp, aglama hergiz,
giden getirilmez gozýaş biläni.

Sen özüňi har edeni har etjek,
hor edeni hor etmekçi bolma hiç.
Haka tabşyr elýeterden uzagy,
hem gyssanma, haklaşar ol iru-giç.

Sen yzyňa ejir bilen seretme,
gaňyrylma urulanyň ar bilip.
Sebäbi sen gitdiň, ýykdyň serheti,
galan galdy gara güni ýar bilip...