Durmuş sungaty

Hemme edýän zadyň sungat durmuşda,
saýlap-seçip aýakgabyň, eşigiň
geýinişiň, bezenişiň sungat seň,
soň sözleri saýlap ýa-da saýlaman,
gepmi-gybat ýa-da gürrüň edişiň,
ýa ýollaryň, uzak-ýakyn, şaýlanan,
ýylgyryşyň ýazlar ýaly açylyp,
çytylyşyň gyşlar ýaly, ir gelen,
ynanýan zatlaryň sungat durmuşda,
arzuwlaryň iň esasy, owadan,
tolgunyşyň sähel zada çaga dek,
ýa täzeräk gelen ýaly obadan,
gyzgyn çaýyň hopurdadyp içişiň,
ýa-da ýoldan, maşyn akýan dyngysyz,
dursalar-da, gorky bilen geçişiň,
ýa itli köçeden sowulşyň gaçyp,
soň içeriň, haly, palas düşelen,
göwni açyk üçin gapysy açyk,
hem sanawy alynmaly zatlaryň,
dükana gideňde gyssanyp, zerur,
bişirýän naharyň, oduň, ojagyň,
ýazan goşgularyň, bu günki, öňki,
bularyň barysy sungat, düşünseň,
düzet, işle nokada çen iň soňky.