Ildeş

Ildeş diýmek näme, watandaş näme,
ýa tiredeş, ýa arkadaş, pikirdeş,
özbaşyňa ýaşap ýörkäň bilmersiň,
oýlanarsyň göreşeňde il üçin,
ýaralanyp, ganyň sarkyp ýatyrkaň,
ýa türmede, ýesirlikde aç, suwsuz,
ýa-da ýat illerde ýeke galaňda,
biri salam aýdar, tanyş-biliş däl,
alkyş aýdar, ýüregiňe melhemlik,
beýlekisi tanyş ýa-da meslekdeş,
has okuwly, has rahat ýerleşen,
bukulyp hat ýazar ýüregiň bulap:
ejeň öldi, biz öldürdik, ha-ha-ha,
kakaň öldi, biz öldürdik, ha-ha-ha,
ar almakdan geçen, gelip bileňok,
ar-namysdan çişip, ölüp bileňok,
tanarsyň hem tanamarsyň olary,
ildeş diýmek näme, watandaş näme,
ýok, başda däl, soň aňlarsyň bulary.