Sen millete ýaşamagy öwretme

Sen adama ýaşamak ne, ölmek ne,
gara ýere depin bolmazdan ozal,
bäri-bärde düşündirip bilmersiň,
çünki olar şübhelener, geň galar,
sen neneňsi biljek beýle zatlary,
hemem mamla bolar, belki,
sen adama ýaşamagy öwretme,
özüň bilmän ony ilki.

Seret ozal nämä berýäň wagtyňy,
düşünjek bol işiň näme, derdiň ne?
Nirelere geldiň ýa nirde galdyň,
nämeleri görmän geçdiň, gördüň ne?

Sen haçan, nirede başladyň ýaşap,
haçan pikir etdiň ýeňsäňi gaşap,
haçan ilki sorag berdiň özüňe,
men näme ýa kimkäm diýip,
göni garap durmuşyňa, gözüňe?

Sen halkyňa ýaşamagy öwretme,
ölmegi öwretme hasam,
ýa öwretme göreşmegi,
ýa-da garaşmagy entäk,
sebäbi adamlar özüçe ýaşap,
ölýär, meger, özüçe täk.