Biz özümiz özümizi söýmeli

Biz özümiz özümizi söýmeli!
Biz özümiz goramaly özümiz!
Biz özümiz özümize söýgini,
bagty, gül-gunçany bermeli peşgeş.
Biz özümiz beýgeltmeli, belende,
duýgularyň terligine göterip.
Biz özümiz özümizden doýman hiç,
özümiz özümiz basmaly bagra.
Biz özümiz öz gadrymyz bilip giç,
a soň öz-özümiz gyýylyp-aglap,
örtenip ölmän,
kese-kesekiden,
ýatdan-ýakyndan
ýagşylyga, gowulyga garaşyp,
biz özümiz özümizi söýmeli,
biz özümiz goramaly özümiz,
öz söýgimiz bilen, ýanyp-tutaşyp.

Goý, söýgüden ýansyn biziň gözlermiz,
jigerimiz ýansyn, bagrymyz ýansyn.
Ahmyrdan, armandan, gazapdan ýa-da
gorkudan, ýigrençden kürşerip ýörmän,
biz özümiz özümizi söýmeli,
biz özümiz goramaly özümiz.
Ähli peslikleri, ejizlikleri
söýgi bilen, päklik bilen ýeňmeli,
biz özümiz özümizi söýmeli!