Hakykatyň hyrydary bolmaýar

Hakykatyň hyrydary bolmaýar,
az bolýar ýa-da.
Ertekini üýşüp-üýşüp alýarlar,
nobat gurup asyrlap,
adam özün ýalan bilen basyrýar,
Isa bilen, Dawut bilen,
Süleýman... bilen basýar,
bilmeýänin biljek bolman, tanaman,
gol uzadyp daşdan bagryna basýar;
ol özüni beslemeýär çyn bilen,
şu günki ýa ertirki,
düýne gidýär gomalyp,
hem geçmişden geljegini gözleýär,
bu owarram, iň ýamany, beteri,
adam özün ertekiden agtaryp,
ýalanyň owadan daryndan asýar...