Ýowşan Annagurban

Kaliforniýa depderinden

Diňe öý-içeriň, ýatýan ýeriňi,
aşhanany ýa garažy argylap,
daş işikde küýze goýup güllüje,
suwa düşüp ertir-agşam,
arassa ak köýnek geýip,
ýaşap bolmaýar tämiz,
ýaşap bolmaýar owadan,
iýen agzyňa bakyp,
saýgarmasaň iýýäniň,
diýen agzyňa bakyp,
saýgarmasaň diýýäniň,
hemem beýnä çöken göýdük gepleri,
pikirleri – ýaramajak hiç zada,
wagtal-wagtal äkidip,
zyňmasaň adamsyz ada,
argylap bilmeseň ýüregiň, beýniň,
ne ýaşap bolýar arassa,
ne uzaga çekýär oýnuň...