Göreş meselesi
"Ýekäniň çaňy çykmaz." Türkmen nakyly
Göreş birniň meselesi bolmaýar,
käte göreşse-de diňe birleri,
iki, ýeke bolup müň garşysynda,
döşlerini tutup, ýagmyr deý güllä,
beýlekiler ýatyp, garaşyp yzda,
näden-näme bolar diýip yşyklap,
ýorgan aşagyndan çykaryp kelle.
Göreş birniň meselesi bolmaýar,
onda-da adalat üçin,
hakykat üçin göreş,
pul üçin däl, mal üçin däl,
ýa-da wezipe üçin,
şöhrat üçin ýalandan,
diňe galplyk bilen gazanyp bolýan,
saklap bolýan birneme,
ili çykaryp sandan.
Göreş birniň meselesi bolmaýar,
çünki birniň çaňy çykmaz, çyksa-da
suw seperler ol çaňa,
göreş birniň meselesi bolanda,
"haýyn" diýer döwlet oňa.