Uly günä ýa-da dogry gep

Adam aýtdy:

"Öňki prezident döwletdäki ähli serişdäni we mümkinçiligi özüne päsgel bolup biler öýden adamlaryny satyn almak ýa-da zyýansyzlandyrmak üçin ulanýardy, döwletiň ýa halkyň hasabyna hajy bolmak hem şol serişdeleriň birine öwrüldi. Bir gezek ol köşgünde maňa-da Saud Arabystanyna gitmegi, hajy bolmagy teklip etdi.
"Şu gezek senem döwlet uçarynda Mekge-Medinä gidýänleriň sanawyna goşup, hajy etjekdirin, taýynlyk görüber, hajy aga bolsaň, toýda-ýada törde ornuň bolar, täzeje etden doýsaň, aýal ýumuşlaryna-da gowy ýararsyň" diýdi. Men: "Ýok, meni o sanawa goşmaň, başga höwes edýän kändir, ornuny almaýyn, şolaryň biri gitsin" diýdim. Ol: "Näme, arak-şeraby goýup bilmerin öýdýärmiň? Beýleki kärdeşleriň araga duz atyp, halallap içip ýör, senem şeýdersiň-dä bolmasa" diýip güldi. "Ýok, arak-şeraby goýmagy alada edemok, ony goýaryn, ýöne ondan has ulurak günä bar, ozalky eden günälerim hem az däl, üstesine olam urna bolmasyn" diýdim. "Beh, beh, o nähili uly günä?" diýip, "beýik serdar" çyny bilen sorady. "Gybat, köp gybat edýän ýa edilen gybaty diňlemeli bolýan, şony goýup bilerin öýdemok" diýdim. Ol birden myssaran ýaly boldy-da: "Munyň-a dogry gep" diýip, agyr dymdy. Soňundan bolsa: "Bäh, ýazyjylaryň içinde dogrusyny aýdýanam bar eken-aý!" diýip, gülen boldy."