Ýaşamak – hüňürdemekmi?

Adam aýtdy:

“Gürletseň, her kim prezidentden nägile, hüňür-hüňür edýärler asyl: ‘Depämize çykdy, bu golaýda düşjege-de meňzänok, özi ölse ogly, agtygy bizi eşek edip münjek bolup garaşyp dur’ diýýärler. Emma çala egilseň, her kim prezident, derrew depäňe çykjak we bäri-bärde, özünden bilip üstüňden düşjek däl. Tersine, ‘kelläň çüri ýa gaty, otyrýerimi agyrdýar’ diýip igenjekler. ‘Düş’ diýseň bolsa, gara çynlary bilen öýkeleýärler. Ýüzlerini kürşerdip, hüňür-hüňür etjekler. Ýa ýaşamak hökman birleriniň depesine çykmak ýa birlerinden nägile bolup hüňürdemekmikä?”