Öwrenişilen ýer

Adam aýtdy:

"Eger adam ozal ol ýa beýleki tötänlik esasynda ulurak bir ýerde işlän bolsa, hakdan-nähakdan baýasa, aýalyny altyn-zere, çagalaryny bolçulyk batgasyna batyrsa, ol kürsüsinden düşürilenden soňam, hatda ogurlykda aýyplanyp türmede oturyp gelse-de, ýurtdan gaçgak bolsa-da, gürleşýän adamsynyň kimdigini bilmän üstüne dazarylsa, sesini gataltsa ýa ömür görmedik-bilmedik admyny ýok gänäde aýyplap, mamla däldigi belli bolanyndan soňam ötünç soramasa, ne gaharlan, ne-de geň gör. Sebäbi ol özüniňkiden başgarak, has başgaça durmuşyň bardygyny, başga adamlaryň, başga pikir-garaýyşlaryň bardygyny bilmeýär. Muňa onuň kellesinde ýer, orun ýok, ol kelle başga, belki-de düýpden ters tejribeler we pikir-garaýyşlar, ynançlar bilen dykalanyp dolduraylan. Bu ynançlardan ýa öwrenişilen, endik edilen rahatlyk çukuryndan çykmak her kime başartmaz. Sebäbi adam köplenç, özüni we töweregindäkiler inçegöz elekde eläp bilmese, ýa özüniň, ýa-da özi ýalylaryň üýşüren-toplan zir-zibiliniň içinde galýar. Kim bolsa bolsun, adama başga biriniň zir-zibiliniň içinde ýaşamak we ölmek agyr degýär. Iň geň ýeri, köp adam öz zibiliniň içinde, hapa ýa porsy bolsa-da, arkaýyn ýaşaýar we arkaýyn ölýär."