Gynanmaly adam

Biri aýtdy: garny aja gynanma, bir döwüm çörek tapsa iýer, tapmasa - suw içip ýatar. Kalby aja gynan, sebäbi onuň näçe mal-mülki bolsa-da, gözi doýmaz. Ýalaňaja, ýa köne-küşül, ýyrtyk-ýirik eşikli, aýakgaby tozan adama gynanma, ol tapan zadyna begener we bolany bilen mydar eder. Dünýäniň çar künjünden üstüne halta-halta eşik, aýakgap getirilýäne gynan, oňa näçe köp getirilse, şonça-da az görner. Öýsüz-öwzarsyz adama gynanma, pena tapan ýerinde ýatar, ölmese ertire çykar. Emma otag-otag jaýly, köşkli-eýwanly adama gynan, oňa bary az görner, rahat ýatara ýer tapmaz. Arassa, gowy niýetli, ile-güne ýüregi awaýan, baryny bermäge taýýar, haýyr iş etjek bolýan adama gynanma, sebäbi ol bir ýagşy söz diýseň pagyş-para bolar, başy gök dirär, içinden «Il beýik-laý» diýip, hem özünden, hem adamlardan razy bolar. Emma gara güýje daýanyp, hapa iş edýän, şol bir wagtda-da özüni öwdürýän adama gynan, ol hiç öwgüden, tarypdan doýmaz, sebäbi daşyndan hoş görünse-de, içinden olaryň çyn däldigini biler, gorkar.