Ýürekdäki tütün

Türkmen diýýär ýekäniň
çaňy çykmaz, agzybir,
jebis bolalyň dilde,
iş ýüzünde iki, üç,
ýa dört bolup gürleşip,
dogry, düzüw işleri
bitirmeýär birleşip,
hökman agzy alarýar,
çekýär hersi bir gyra,
tutulmadyk aýynyň
derisini, meniňki,
ýöne şerde bitewi,
ýa-da namart oýunda,
dil tapyşýar, sada il
haýran galýar aňalyp,
ýurt malyny çapmakda,
ogurlykda birleşýär,
ýa birleşýär ýalanda,
bir-biregi ezmekde,
kemsitmekde esasy,
sokýar ýere garawsyz,
ejiz bolsa doganyn,
doganoglan, ýegenin,
aljak ýerin, bar zadyn,
itjek özün çukura,
çagasyna gynanman,
sylagy ýok adama,
diňe gorky saklaýar,
gel, geleli bir ýere,
bir-biregi goraly,
horlanmasyn çagalar,
garry-gurty, aýal-gyz,
diýseň diýýär şeýdeli,
emma beýle işlerde
bogulmaýar hiç sübse,
sebäbi ýok ynamy,
diýýär iller goldamaz,
belki, mamla, bilýändir,
ot bolmasa, tüsse ýok,
ýa içerden gelýändir...