Mydar nokady
Milan Kunderanyň äheňinde
Gara güýje garşy göreşi iliň,
ýa adamyň, zulum bilen dikleşýän,
hakydasyn, huşun goramak bolar,
durmak bolar öz iliniň ýanynda,
aýdymlaryn, sazyn ýatdan çykarman,
edebini, adyn, asyl gylygyn,
ojagyny ojak eden alawly,
ojar odun, sazagyny unutman,
at çapan düzlerin çykarman ýatdan,
çünki halky ýok edýänler birleşip,
onuň huşun, hakydasyn bozarlar,
ýok ederler kitaplaryn, sungatyn,
taryhyny ýok ederler, soňundan
çöpläp iliň ogul-gyzyn düşünýän
ýeke-ýeke düşürerler duzaga,
tylda ýa-da alyp gidip gelmeze,
ýok etmäge başga ili, milleti,
arasynda ýazyp başga taryhy,
ýykylsa, durmasa aýak üstünde,
gara güýje garşy göreşden adam,
gitse gaçyp, ýat illerde aglasa,
akyl-huşun jemläp bilmän başynda,
kimdigini, nämedigin unudar,
bu bolar oň, meger, soňky pillesi,
niçik diýseň diýer edýärin mydar.