Ýalan dostluk

Dost däl, duşman bolsaň adama, belli,
ýa özüňe, ýa dogana, kärdeşe,
ýüzüne öw, ýa zat diýme, saklama,
ýa goltgy ber ýalňyş ýola düşende,
çilim eçil, nas hödürle, arak ber,
ýa seçele Saparmyrat neşesin,
pessimist diý haky gözlän Pyraga,
çagasyny, maşgalasyn aýama,
dargap düşse bir-birinden yraga,
soňra seret, nädip ýykýar özüni,
ýa öýüni, ojagyny tozduryp,
nirelerden çykýar azaşan bende,
düýnki çarwa, bu gün diplomly, belki,
dostuna dert bolup, duşmana – gülki!

Dost däl, duşman bolsaň döwlete, belli,
ýykylsyn, dargasyn diýseň içinden,
ýüzüne öw, ýeňseden öw ýa-da dym,
näçe ýyldyz daksa döşüne köwek,
şonça begen, özün aldan mähelle
durmaz diňe çynyn aýdany döwüp,
özün döwer, bejerjegi goýbermez,
bir adam däl, hatarly il ýalňyşsa,
ýa ýalany ýüze edinse perde,
bile-göre, boýun alman kaşlygyn,
ýalňyş ýoluň soňy beter bor barha,
has agyr bor gazabyndan başlygyň...