Başagaýlyk

Ýaradan, hak, bagty ýatsa milletiň,
ýazyjynyň “Ý” harpyna degmeýän,
şahyrlygyň “Ş”harpyna degmeýän,
žurnalistiň “Ž” harpyna degmeýän,
ýazyjy-da bolýar, şahyr-da bolýar,
žurnalistem bolýar, baýragam alýar,
üstesine, aýbyn bilmekden geçen,
haçan, nirde, haýsy tema gozgalsa,
gaçyrjak ol, gezek bermän gürleýär,
ýokarda gün ýaşýar ýanyp gyssanmaç,
a aý pahyr utanjyndan derleýär.