Bu belli zat, ýöne biri
ýatlatmaly ýaly günde,
eger-de sen gerek zadyň,
zeruryňy gözlemeseň,
yzlamasaň ýola çykyp,
gelmez özi sorap adyň...

Dükan, kassa, aýal adam
alan apelsinin goýdy,
almajagyn aýdyp yza,
kemsiden dek özün miwe,
men bilýärin bu ýagdaýy,
pul gutarsa, mertebe, ar

Gowulygyň, sahawatyň,
ýa terbiýäň, öýde alan,
ýarag bolar bir gün görseň,
ulanylan öz garşyňa,
bu bir nakyl başga ilde,
biziň ilde akyl, gelýän

Agyr günler gerek käte,
görmek üçin durmuşymyz,
kimler onda dogan, gardaş,
ýa kim çyndan dost-ýarymyz,
ýa-da ýoldaş, hakykysy,
ýa kim ýöne geçip barýan...

Platon aýdypdyr tagta
çyksa bir gün ýurt samsygy,
ilki bilen etjek zady -
lal, jim eder danalary,
soň üýşürer öz ýanyna
akmak bolsa gözläp, tapyp,

Diktatora kömek ediň,
ýardam beriň ýerli-ýerden,
darykmasyn, ogry syrty
gowşak bolar, ýatyp bilmän,
ýüregine agram düşüp,
öňem biri ýaly birden,

Adam özün sylamasa,
sylamasa sözün adam,
ýüz-gözüni sylamasa,
sylamasa agzyn adam,
nämeleri diýmez, aýtmaz,
özi bilen ikiçäk däl...

Žurnalistiň gytçylygyn,
adaty däl, ýazjak bolýan,
etjek bolýan işin gowy,
urulsa-da ýüzüne kän,
etegine salyp başyn,
döredýänler bilýär işin...

Öňem birniň aýdyşy dek,
ýalňyşýarka aýdyp, diýip,
öz-özüni ýykýan wagty,
ýetim, naçar hakyn iýip,
duşmanyna il-ulusyň,
bir seniň däl, berme öwüt,

Sen söweşiň ýeke durup,
söweşýärkäň ýaralanyp,
bir eliňde sargy, biri
ýaragyny gaçyrmasyn,
gelmez adam äbermäge,
eglip bilmän, dursaň dertli...