Watan bilen ikiçäk

Watan, seniň bilen galdym ikiçäk,
Başujynda mazarynyň enemiň;
Men seni söýmändim wezipe üçin,
Ýa mal-mülke gelmedim men emenip...

Watan seniň bilen galdym ikiçäk,
Başujynda hassa ýatan atamyň;
Men seni ýigrenmen ýalňyşym üçin,
San-sajagy bolmasa-da hatamyň...

Watan, seniň bilen galdym ikiçäk,
Ýykyk-ýurmuk ýollarynda Tejeniň;
Men gitsem-de senden geçmerin, çünki
Mazary bar Tejeniňde ejemiň...

Maý, 2013.