Şahyr ölse...
Şahyr Gurbannazar Ezizow 1975-nji ýylyň 29-njy sentýabrynda, ýaş ýazyjy-şahyrlaryň bütinsoýuz duşuşyklary wagtynda Gazanjyk obasynyň golaýyndaky gara ýolda gaçgak esger tarapyndan atylyp öldürildi.
Şahyr öldi, ölmezden ön hiç kimse
onuň setirlerne bakmandy siňe.
Goşgy ýazýan gytmy, biridi bolsa,
öldi-de hemmeden saýlandy öňe.
Dostlar, dosty däller gürledi joşup,
görsek, görenini görýän bar eken.
Ölmezden öň hemme gyradeň, meňzeş,
soň bilinýär alma eken, nar eken!..
Emma siňe baksaň, bilinmez soňam,
mazar bilen bile çöküşer şowhun.
Başga döwür, başga durmuş dogular,
başga ugur-ýola atylar owsun.
Soň diýerler “öz döwrüniň ogludy”,
ýogsa ol şol döwür sygmandy ýurda.
Ýöne şahyr ölse, köşeşer biraz
onuň goşgularyn ýigrenen orda...