Geler soňy gyşyň, garyň

Gazawatda gyrdy duşman,
gyrdy duşman Gökdepede,
ýer-ýurdumyz almak üçin,
gyrdy duşman Garagumda,
gazamada salmak üçin,
dilimizi, dinimizi
gara ýere çalmak üçin,
ýüregimiz bardy, öldi,
içen bolup ýalan güldük,
öz-özümiz aldan bolduk,
bile-göre bolýan zady,
ruhuny goýup ahyr,
ýygnaýança bar sülsadyn,
belki, bize eli ýetmän,
gitdi duşman, indi üýşüp,
öz-özümiz aldaýarys,
talaýarys bir-biregi,
goragsyza gülen bolup,
öňem dünýä gelen bolup,
bilinmezi bilen bolup,
galan gylyk gidenlerden
ýagy etdi ýurda bizi,
bilýänimiz talaňçylyk,
öldürýäris mal-mülküni,
hak-hukugyn goraýany,
soraýany soragyny,
bogman içde, çaga ýaly,
düşürdilýän ulalmanka,
ýöne hemme çaga ölmez,
galar diri bir, ikisi,
ýa üçüsi, ene-ataň,
agalaryň ganyn sorap,
turjak ýerden, ynanýaryn,
senem ynan, ýat illerde,
geler soňy gyşyň, garyň!..