Iberilmedik hat

Sebäp seniň eneň, ataň,
öwretmedi düşündirip,
görkezmedi gözüň açyp,
görmelini, bilmelini,
okadyjy okatmady,
on, onbäş ýyl mekdeplerde,
gatnasaň-da päpkäň süýräp,
islemän däl, bilmän, belki,
hökümetler, hanlar öňki,
şalar ýa-da halyfatlar,
gelen galyň kitaplary,
köneleri ýakdy, ýykdy,
täzeleýän diýip bilip,
ýa-da bilmän näme edip,
nämeleri goýýanyny,
öz gözlerin oýýanyny,
sen bir hamyr çagalykda,
soň bir saklan, gazetleri,
žurnallary okama-da,
sorag bermän, doga ýaly,
gyra goý-da kitaplary,
otur pikir edip biraz,
ýesir, gula ýazdyrylan,
bilmeýäne näme ýazýar,
gyzýar haýsy ot-ojakda,
ýa giripdir işe nädip,
näme üçin, çörek gözläp,
pikir, ýol däl, aljyrana,
satlyk sürä seretme sen,
gorpdan bökýän ata-baba,
gözle guly, satylmadyk,
satylmajak satylsa-da,
öz-özüni sylaýan hem
pes görmeýän hiç bir şadan,
kiçeldenden kiçi bolup,
bolma gömük, nadan adam!..