Ýowşan Annagurban

Garyplyk adama hudaýdan gelmez

Garyplyk adama hudaýdan gelmez,
Adamdan geler.
Emma adamy aldarlar,
Hudaý berýär diýip baýlygy baýa.
Ol ynanar akmak bolsa, elbetde,
Hemem galan ömrün eder gyr-zaýa.

Dogry, deň ýaratmaz hemmäni hudaý,
Beýikli-pesli ýaradar.
Ýöne syna sagat dogulsa adam,
Aň-üşügi bolsa, okasa, össe,
Hudaýy günäläp bolmaz bir zerre,
Nirede bir kümsük ýoluny kesse.

Nirede bir kezzap baý bolsa hemem
Bar-ýoguňy garbap alsa eliňden,
Nireden günäkär bolýamyş hudaý,
Bilýärmiň sen ne çykýanyn diliňden?

Akyl adam akylsyza aldatmaz,
Emma aldanan bor alaçsyz käte.
Daşyndan zeýrener gara maňlaýdan,
Içinden aldany ýigrener öte.

Garyplyk adama hudaýdan gelmez,
Adamdan geler.
Geler doýmaz-dolmaz açgöz sürüden,
Agzy ýetse, iki egnini iýjek,
"Hudaý" diýen bolýan dilinde diňe.
Adam bolan adam bilýändir muny,
Adam bolan bildir seretseň siňe...