Ogry hem il
Ogra ýalbarýarlar daşdan,
Daş-kesege bukulyp:
“Iýme-dä ýetimiň hakyn,
Ölmesin-dä ýykylyp?”
Ogra takal okaýarlar,
Gaçyp gidip daş ýurda:
“Talama-da öz iliňi,
Çozan ýaly aç orda?”
Tankyt edýärler ogryny:
“Eýitme-de, beýitme!”
Emma ogry ogurlanyp,
Oturdylan beýikde.
Golaý baran öwýär ony,
Ogry däl-de, dogry diýip.
Başarsalar serpaý aljak,
Bolman doýjak palaw iýip.
Şo sebäpden eşitmeýär,
Bilmeýär ol aýdylýanyn.
Ýatlatjak ýok golaýynda
Ahyry boş gaýdylýanyn.
Ilçilik-dä, gahar edip,
Ýazdy biri uzyn nama:
“Ili çapyp ogurlanyn
Alyp giden barmy näme?”
Ogry diýdi gazap edip:
“Töhmetçini tapyň, asyň!”
Şondan bäri gözleg gidýär,
Tapyljakmyş pahyr basym...
()