Galyp

Barmyka galypdan gaçyp gutulan,
ýa-da ýeten höwesiniň yzyndan?
Ozal erkinligi küýseýär adam,
soňra laýa batan ýaly dyzyndan,
başky ýagdaýyna dönmek isleýär,
köne dostlaryny küýseýär gaty.
Barmyka galypdan gaçyp gutulan,
ýa-da çaman gelip ykbalyň aty,
hemme kerpiç bolup guýulmalymy,
bir ölçegde, bir agramda ylaýyk,
ýatmalymy güne serlip gurynça,
bişmelimi soňra haýat ýa jaýyň
diwary bolmaga örseler tekiz,
owadanlap, belki, keşde deý gaýap?
Barmyka galypdan gaçyp gutulan,
sen özüňi ondan biljekmi aýap?