Dialog

Biri diýdi: “Daşdan görnüşiň ýaly,
gyňyr hemem gedem däl ekeniň sen!”
Beýlekisi diýdi: “Açyg-aý eliň,
aňryňa basan deý dünýäni öňden...”

Biri diýdi: “Içmän, çekmän, aýala,
ýa baýlyga çapman nädip ýaşaýaň?”
Beýlekisi diýdi: “Wezipe, şöhrat,
at diýmeseň, munça ýüki daşama!”

Biri diýdi: “Kiçigöwün ýylgyrýaň,
ýöne birden ýanyp gidýär gözleriň;
Nädip gaharyňy basýarsyň beýle,
nädip diýmän goýýaň diýjek sözleriň?”

Biri diýdi: “Kiriş kibi, siňirleň --
duran ýaly gyrylmanyň bärsinde?”
Beýlekisi diýdi: “Giň-aý sen gaty,
ýa-da ýoga-soga edýäňmi günde?”

Biri diýdi: “Hassa diýip eşitdim,
gidip barýan ýaly etdiler asyl?”
Beýlekisi diýdi: “Türmede senem,
o biri deý, goýup bolardy asyp...”

“Şonda – diýdim – giňärmidi seň ýeriň,
ýa-da ýeňlärmidi o birniň derdi?”
“Ýok-la..." Gümmi-sümmi etdi birisi,
beýlekisi diýdi: “Biraz ýeňlärdi...”