Fransuz depderinden

Nise gitdik Nitşäň ýörän ýodasyn
tapyp, aşak düşüp görüp eňňitden,
soňra ýene galmak üçin ýokaryk...
Görsek yzymyzdan bir adam gelýär,
bir zatlar hümürdäp türkmen dilinde.
Baýramgüli çekdim gyra ýodadan,
baglygyň içine tutup elinden.

Geçip gitdi adam, görmedi bizi,
şindem gulagymda igençli sözi:
"Onda her kim türme üçin kandidat,
uly-kiçi, başdan-aýak,
bärdäkiň barjasy hökümdar boljak,
torbasynda daş ýa taýak..."