Mejbur bolsaň

Mejbur bolsaň bendilikde,
hapa-harsyň içinde,
aç hem suwsuz, gara günde
ýaşap bolar, elbetde,
il-gün bilen gelende,
belki, ‘toý-da-baýram’ diýip,
ogurladyp gözel ömrüň,
soňky döwüm nanyň bilen,
ýa ýuwunjak sabynyňy,
türme sakçysyna doýmaz,
gözüňde gorky görnetin,
ýüregiňde has-da beter,
ýaşap bolar zyndanda,
içjek suwuňy diläp,
iýjek nanyňy diläp,
öwüp bolar üstesine,
ýazyp bolar goşgy-gazal,
waspyn edip türmäniň,
aman galmak umydynda,
aýdym aýdyp bolar, belki,
alkyş aýdyp baş türmeçä,
emma ony söýüp bolmaz,
aşyk bolup bolmaz türmä,
göýäki bir gözel gyz,
göz-gaşyna çeken sürme,
eger şuňa gelen bolsaň,
bagtly bolsaň egileňde,
başyň egip baş türmeçä,
taýyn bolup aýakgabyn öpmäge,
ýa-da ynanasyň gelse
bagtlydygňa şu ýagdaýda,
gara günüň özüňden gör,
başga kişiden görme!