Diňlemezlik derdi
"Ol ýigitler adam dilli haýwandyr, Söz aňmasa, hem ygrary bolmasa." Magtymguly
Diňlemegi öwretmeli adama,
belki, çagalykdan, bäbekliginden,
ýa-da heniz ýatgysynda enäniň,
soň giç bolýar, gürlemegi öwrenip,
ses gataltmaň gujagyna dolansoň,
ýa-da diliň eýgiligin görmegi
endik edinensoň adam çagasy,
diňlemege peslik diýip düşünýär,
hemem düşünmeýär aýdylan zada,
sebäbi diňleýär ýarym,
ýa ýarymçyk, jogap bermäge diňe,
gaýtargy bermäge ýa sanaşmaga
taýýarlaýar adam özün,
başarmasa diňlemegi,
düşünmegi gepe-söze,
hem bilmeýän zadyn bilenden bolýar,
düşünenden bolýar dünýä has gowy,
meger, şondan adamlaryň arasy,
dost ýa dogan, ýa är-aýal,
has açylýar ýylba-ýyldan,
diňlemegi öwretmeli adama,
alyp galyp galmagaldan.