Hudaýyň kösenji

"Ýekelik hudaýa ýagşy" diýýärler,
hiç ynanyp biljek däl.
Ýekelik ýagşy bolsa,
ýaradarmy munça janly-jandary,
bir-birinden üýtgeşik,
hemem meňzeş almanyň
bölegi ýaly iki,
ýa ýüregi hiç gysmadyk bolanda
ýaradarmydy hudaý
munça bagy, bakjany,
gülleri, ösümligi,
däli ýaly, san-sajagyn ýitirip,
ýa ýaradan ýekeligi söýende,
meniň ýaly, seniň ýaly birine
galam ýa-da çotga biýrmi getirip?

Ýok, hak-hudaý ýekeligi hiç haçan,
eger-eger söýen däldir, bilýärin
her setirim aglap inende dünýä,
hudaý, meger, irmän-arman ýaradyp,
bir düşünýän tapjak bolup kösenýä...