Portrete ştrihler

O pahyryň gözi, garny doýmady,
ýogsa ozal kommunistdi,
kommunizm gurupdy,
baýlaryň malyny garyba berip,
ýerin alyp ýerliniň,
bag-bakjasyn gurudypdy,
ýykypdy jaýyn jaýlynyň,
adalatyň adyndan,
kim Sibirden çykdy,
kim başga ýerden,
halkyň huşy kelte bormuş,
hem ýagşyny, hem ýamany
çykararmyş ýadyndan,
indi iliň sylaýan
aksakaly, hormatly ol,
telpegi baş başynda,
hem metjide gatnaýar,
hem çärede birinji,
emmaki her nahardan soň sadaka,
artýar içde öz-özüne ýigrenji.