Ýowşan Annagurban

Ýalan gala

Sen ýalana egsik baha berme hiç,
hiç ýalana kemter baha eçilme,
iberme çagaňy ýalan mekdebe,
ýa ýalan saýlawda seçme, seçilme,
ýa ýalandan gala gurma der döküp,
gorag bolar ýaly ertir çozsalar;
sen ýalan ýaryşa goşulma hergiz,
at-eşegiň salma ýalan aýlawa,
gyrasyna barma ýalan tomaşaň,
ýa el çarpma öwülýänler ozsalar...

Sen ýalany äsgermezlik etme hiç,
hiç ýalana egsik baha eçilme,
hatda pilden uly gör,
peşeçe bolsa ýalan,
sebäp ertir ýalan mekdebe gatnan,
ýalan diplom alan köpeler çenden,
hem hemmesi akylly bor,
edenli bor senden, menden,
a ýalana ýalan diýen,
gaçmaly bor baş alyp,
sen ýalany äsgermezlik etme hiç,
sebäbi soň äsgereniň bolar giç!