Hemmeler bilýär

Hemmeler bilýär ýa-da
ysyn alýar ýanygyň,
birleriniň ýürek-bagry ýananda,
ýa-da atylanda töhmet oduna,
emma köplük muny bilmedik bolýar,
ys almadyk bolýar ýa-da
görmedik bolýar asla
küren obaň üstün örten tüssäni,
çünki bilýäniňi bildirip, gelip,
ot söndürjek bolmak,
ýa-da hassany
diňe sorap gitmek oňaýsyz örän,
şondan köpler tüsse görse durmaýar,
dertli görse, sowlup geçýär ýanyndan,
ýa-da geçjek bolýar gatyrak ýöräp.

Hemmeler bilýär ýa-da
ysyn alýar ýanygyň,
ýöne ot söndürjek bolmaýar köpler.
Şondan gezek-gezegine
guraýar hem ýanýar ýaşyl tokaýlar,
pälwan daragtlary ýalna çawladyp,
agladyp aşakdan ösüp gelýäni,
emma ýanyp, kül bolsa-da,
begenermiş muňa çöpler...