Durmuş

Oýlanmaga wagt goýmaýar durmuş,
maý bermeýär pikir edip durmaga,
gitmeli, ylgamaly, ýetmeli yzyndan çapyp,
diňlemeli habarlary sypdyrman,
biri-birisinden möhüm,
söhbetleri diňlemeli, çyn bilseň,
kitaplary okamaly, çuň bilseň,
bilmeli näme bolýar,
aňlajak bolmaly käte aýdylmaýan zatlary,
görjek bolmaly ýandan
näme bolýar ol ujunda zeminiň,
ýa-ha çala görüp, ýa görmän asla,
ullakan suraty görenden bolup,
aldamaly däl özüň.

Oýlanmaga wagt goýmaýar durmuş,
maý bermeýär ýedi ölçäp,
ýeke gezek kesmäge,
gyssaýar, iterýär ýeňseden öňe,
sebäp dursaň hemem seretseň siňe,
seniň ony birden, adamçylyk bu,
tanamagyň mümkin, aňmagyň mümkin,
hemem başga pikir etmegiň mümkin,
hem gitmegiň mümkin onuň
garaşmaýan ýolundan,
ýa barjak bolmagyň mümkin
islemeýän ýerine,
meger, şondan iş-aladaň köpeldip,
barha basmarlaýar, basýar ýaşaýyş,
oýlanmawer diýip, edýän deý haýyş...