Yrza bolup gidilmeýär

Kakam Bäşim Annagurbana

Yrza bolup gidilmeýär jahandan,
emma neden ’yrzadyryn’ diýýärler?
Yrzalaşýar ata-ogul, ene-gyz,
’Görmesek, yrza bol’ diýýär ýakynlar,
ýa-da ýatlar, eziz bolan ýakyndan,
barmy munda ar medalyn dakynman,
ýa-da giden ýaralanman bahyldan,
hem dowzahdan ozal namartdan ýanman?

Emma ’yrzadyryn’ diýýär atalar,
a eneler girýan ojak başynda,
ogluna, gyzyna garaşyp her gün,
adam ’yrzadyryn’ diýse-de näçe,
yrza bolup bolmaz aýralyk çekip,
yrza ölüp bolmaz ýola göz dikip.

Herhal adam yrzalaşýar, hoşlaşýar,
’yrza bolaweri – diýýär – görmesek’,
yrza bolup gidilmeýär Watandan,
yrza bolup içmez hiç kim gargyşy,
yrza bolup iýmez hiç kim daş, kesek...

13.12.2014. Rockville, Maryland

Bölüme soňky goşulanlar


Sahypadan alnan eserler ýa-da pikirler haýsydyr bir görnüşde metbugatda ulanylanda "annagurban.coma" salgylanmak hökmanydyr.

Any views or opinions expressed on this site belong to an individual and do not necessarily coincide with those of the organization he works for.


annagurban.com copyright © 2006-2019