Döwlet maşyny
Adam aýtdy:
"Arada bir hindi aktýorynyň gürrüňini diňledim. Ol on dört ýaşynda kakam ýogaldy, ejem bilen onuň jesedini maşyna ýükläp, keselhanadan öýe alyp gaýtdyk. Ýolda ejem: "Oglum, sen maşyn sürmegi haçan öwrendiň?" diýip sorady, men: "Şumat öwrenýärin, eje" diýdim diýýär. Durmuş, dogrudanam, maşyn sürmegi-de, köçe düzgünlerini hem, köçede özlerini dälirän ýaly alyp barýan motorlylardan, gyssanmaç taksiçilerden, öwrenjelerden, äpet ýük maşynlaryndan, ýoldaky çukurlardan seresap bolmagy hem öwredýär. Emma öwrenip bolmaýan başga bir zat bar: däli döwlet maşynyndan, açgözleriň jübüsine düşüp, döwlet mazmunyny ýitiren närseden nädip goranmalydygyny öwrenip bolanok. Onuň häsiýetini, gylygyny bilmek-de, haçan we haýsy tarapdan geljegi-de, çagalaryň, garyndaşlaryň, pikirdeşleriň bilen bile ýa-da ýekelikde, ýalňyz özüňi mynjyratjygy hem belli däl. Şonuň üçin-de ondan köp adam, hatda içindäkiler hem gorkýar. Ýöne ol maşyna münüp, onuň roluna geçip, hezil etmek isleýän welin azalmaýar."