Güýç duzagy

Eger güýçli arkasynda durmasa,
ýa ýummasa gözün çala köçede
iki guýguç çigit satyp bilmersiň,
garry ene, gyzjagaz bol, kakasy
işsiz galan, ýa türmede çüýreýän,
ejeň ýapsa, çörek satyp bilmersiň,
tamdyryňy ýykar güýçlüler seniň,
maşyn satmak, ýa jaý satmak owadan,
tirýek satmak tonna-tonna,
ýa heroin başga gürrüň, sebäbi
güýçli durar arkasynda söwdanyň,
alar paýyn, girdejini paýlaşan
gowy bolar žurnalistden kakabaş,
ýa şahyrdan, goşgusynda ýaşaýan,
güp ynanýan çaga gerek diýilse,
ýa diýilse saglyk gerek ýaşlara,
bilim gerek, ösmek gerek öňürti,
soňra başyn çeker ýaly milletiň,
dogry, gülkünç, düşünmedik bolsa il,
ýa bilmedik bolsa güýçliň niýetin...

Eger güýçli islemese okajak,
bir, iki däl, ýylda müňläp döşünden
itilmezdi, ýa-da işsiz, gazançsyz,
entäp gidip, gul bolmazdy ýat ilde,
bu bir oýun, bilseň gowy wagtynda,
ogşamanka çawup gelen bir gülle...