Ýowşan Annagurban

Eger sen meň dogulanym geçirseň...

Eger sen meň dogulanym geçirseň,
Eger sen meň bagyşlasaň ýaşanym;
Kä zatlary aňlanymy geçirseň,
Bagyşlasaň öýe kitap daşanym...

Geçirseň okajak, biljek bolanym,
Bir ýerlere barjak, geljek bolanym,
Ýigrenmeseň, gahar etmeseň soňsuz,
Käte kä zatlary aýdanym üçin,
Ölümimi isläp, urjak bolmasaň,
Göni gelip ýa-da bukdaklap yzdan,
Ýa-da birin ibermeseň taýakly,
Tigirime sokup gaçmaga demir,
Şeýdip maňa nesip etse bir ömür,
Sag-aman gezmäge çaýymy içip,
(galjak ýok, barymyz barýarys geçip),
Pikir etme, diňe maňa ýagşylyk,
Gowulyk edeňok, ilki özüňe
Beýiklik edýärsiň bolaňda beýik,
Sen meni kiçeldip, bolmarsyň uly,
Kişini kemsidip, göwnüňe seýik
Tapyp bolmaz, maňa düşünseň dogry,
Iň ýamany - bolsaň özüňe ogry!

Eger-de sen başarmasaň bagyşlap,
Öldürersiň özüň ýokardan taşlap,
Başganyň däl, öz aýagyň astyna,
Geçir hemem çykma kimsäň kastyna?!.