Milli dereje

Derejesi gerek adamyň, iliň,
obadaşyň, şäherdeşiň, ildeşiň,
doganyň, gardaşyň, daýy-ýegeniň,
dosty-ýaryň, dost dälleriň, bahylyň,
gerek işi eder ýaly birleşip,
uly-kiçi, aýal-erkek, baryna,
dil uzatman kimsäň namys-aryna,
goldaşmaly bolsa, goldaşar ýaly,
dilleşmeli bolsa, dilleşer ýaly,
mal goşmaly bolsa, mal goşar ýaly,
pul goşmaly bolsa, pul goşar ýaly,
kyn bolanda kynlaşdyrman kyn güni,
töhmet atyp, şyltak atyp ýaryşman,
durup adam ýaly gürleşer ýaly,
çeýnemäge derek birek-biregi,
söz gözlemän awy boljak adama,
nyşanalap bagyr-öýken, ýüregi,
derejesi gerek milletiň biraz,
deşmez ýaly gämisiniň düýbüni,
döwmez ýaly abatlanan küregi.