Köpri gurmak meselesi

Sen özüňde paýapyl gur özüňe,
geçer ýaly şu günüňden ertire,
galma düýnki oglan bolup, gyz bolup,
sebäbi däl düýnki derýa öňüňde,
düýnki suwlar akdy gitdi ummana,
balyklary bilen, leňňeji bilen,
bir adamda durma, galma hemişe,
guwanma şol öňki aýranly çüýşä,
sen özüňde paýapyl gur özüňe,
ertirki hem birigünki adama,
taýyn boljak ertir ösjek ýellere,
gopjak harasada, geljek sillere,
iň gowy iş, belki, köpri gurmakdyr,
galmazlykdyr bir kenarda biçäre,
ýa-da galsaň, aýagyňda durmakdyr,
dyza çöküp durman öňünde derýaň,
durmuş derýasynyň gürrüňi barýar,
sen özüňde paýapyl gur hemişe,
ertir uly köpri boljak özüňe,
galma suwsuz çüýşäň bilen delminip,
hem gark bolma gulaçlaman durmuşy,
yzda taşlap adamyň ýa gelniňi.