Gowak sindromy
Öňki kärdeşe bagyşlanýar.
Adamyň atasy gowakda dogsa,
adamyň enesi gowakda dogsa,
kakasy, ejesi, soň ýene özi
gowakda dogulsa, gowakda össe,
goý, ol bolsun hatda altyn-kümüşden,
kapasasy ýaly saýrak bilbiliň,
baryp, daşarynyň gürrüňin berme,
depäňe bermesin diýseň daş bilen,
hatda gelse ýat illere, gowakdan
birazajyk çykan, gören güneşi,
arkasyna şemal çalyp azajyk,
synlasa otuz ýyl iliň durmuşyn,
gowakda ýetişen gowakda galar,
gowakdan çyk diýseň, häzir bol örän,
ýeňsäňden ýygşyran taýagyn salar,
malyna deg, mülküne deg adamyň,
bagyşlar ol, geçirer kän ýa çydar,
basgylanan başyn eger basana,
ýa-da ezen ölse, başgasyn tapar,
gowagyna degme, adamyň bilseň,
yzdan barsaň deper, öňünden – gapar!