Türme hakykaty

Türmede dogulan türmede galar,
öler, belki, çykjak bolman türmeden,
sebäbi ol azatlygy görmedi,
beýnisi bekedi gözenek bilen,
tikenli sim, taýak, açlyk, mätäçlik,
gözüniň öňünde ölen-ýitenler
etjegini etdi, meger,
kemsidilen, haksyz boýdan-başyna,
her gün awy, zäher garyp aşyna
berseler-de iýýän ýylgyryp, gülüp,
sapak aldy görülmedik durmuşdan,
ýaşamagy günde ýaşaman, ölüp.

Türmede dogulan türmede galar,
öler, belki, çykjak bolman o ýerden,
has beteri - el çarpmagy öwrener,
aýdym aýdar türmebaşa bagyşlap,
tans eder enesi, atasy bilen,
sakgal, telpek öňki ardan, namysdan,
mertebeden nyşan däl,
bolubilse gulçulygyň guraly,
türmede dogulan türmäni gorar,
a çykjak bolana diýer zyr däli.